इंजिनदादा इंजिनदादा...

माझ्या मुलाला आतिशय आवडणारी "Thomas and Friends" ची DVD घरी अखंड चालू असते. त्यातली इंजिनं एकमेकांशी बोलतात, भांडतात, खेळतात, कधी आपापसात स्पर्धा करतात, तर कधी एकमेकांना मदत करतात! ते बघता बघता मला दुसरीच्या पुस्तकातली "इंजिनदादा इंजिनदादा" ही कविता नेहमीच आठवते. आज ही कविता कोणी लिहिली ते आठवत नाही. कडवी योग्य क्रमाने आठवत आहेत का नाही, तेही माहित नाही. मराठी ब्लॉग विश्वात कवितांचे चाहते खूप आहेत. कोणाला आठवतंय का कवीचं नाव?

इंजिनदादा इंजिनदादा काय करता?
डबे मी जोडतो, तुम्हाला घेतो
गावाला जातो नव्या नव्या

इंजिनदादा इंजिनदादा काय करता?
निशाण मी बघतो, शिट्टी मी फुंकतो
गावाला जातो नव्या नव्या

इंजिनदादा इंजिनदादा काय करता?
कोळसा मी खातो, पाणी मी पितो
गावाला जातो नव्या नव्या

इंजिनदादा इंजिनदादा काय करता?
झुकझुक मी करतो, तुम्हाला घेतो
गावाला जातो नव्या नव्या